27 septembre 2009 7 27 /09 /septembre /2009 22:03

 

Tapati 27 no Tetepa 2009

 

Taiòraa

Mareto 9, 38-48

 

O vai te faaìte.

(Ruta èv 9,49-50)

38 Ua parau mai ra Ioane ia na, nä ô mai ra: «E Rapi, i hiò atu ra mätou i te hoê i te tätäî i te tëmoni i to òe iòa tei òre i pee mai ia tätou; e ua parau atu ra mätou ia na eiaha, no te mea aore ò ia i pee mai ia tätou.39 Ua parau atu ra Ietu:  «Eiaha te reira e faaòrehia atu; aore roa hoì e taata e rave i te temeio i to ù nei iòa e faaìno vave mai ia ù. 40 Eere ò ia i to ô mai ra, no tätou ia.  41 O të horoà noa mai hoì i te hoê âuà pape na òutou no to ù nei iòa, no te mea no te Metia òutou, òia mau ta ù e parau atu ia òutou na, e òre roa ò ia e ère i ta na utuà.

 

Te teimaha o te haapiiraa.

(Mät 18,6-9; Ruta èv 17,1-2)

TAURA, ÔFAÌ, àî

 42 «Âreà te faaturori i te hoê i teie nei mau taata rii i faaroo mai ia ù nei, e huru maitaì aè ò ia ia täàmuhia te hoê ôfaì rahi mure i nià i ta na àî e ia täorahia ò ia i raro i te tai.

TIPI, rima, Täpü

43 E te hapa ra òe i to rima, e täpü ê atu; e maitaì hoì òe i te rima hoê ia tae i te ao ra, i te rima piti ia tae i te i roto i te auahi pohe òre ra; 

AHI

44 te vähi «e òre e pohe to rätou tuà, e  to rätou auahi e òre e tinaihia». 

TIPI, âvae, Täpü

45 E te hapa ra òe i to âvae, e täpü ê atu; e maitaì hoì òe ia tae piriòì i te ao, i te âvae piti ia hurihia i te , i roto i te auahi pohe òre ra; 

AHI

46 te vähi «e òre e pohe to rätou tuà, e  to rätou auahi e òre e tinaihia». 

 

 

RIMA, mata, Ôhiti

47 E te hapa ra òe i to mata, e ôhiti ê atu, e maitaì hoì òe ia tae mata hoê i te Pätireia o te Atua, i te mata piti ia hurihia i te auahi i te ; 

AHI

48 te vähi «e òre e pohe to rätou tuà, e  to rätou auahi e òre e tinaihia». 

 

49 E hope roa hoì i te rapaauhia i te auahi, mai te mau tütia atoà i rapaauhia i te miti ra.

 

No te feiä Maì

Tei te fenua ìmi ora òutou, i te faanahoraa a te maì.

No te ravaì òre te raveà, i to tätou fenua âià o Mäòhi Nui.

I revä mai ai tätou i te fenua färani.

E piti tähitiraa reva no te moana üri paò.

Te moana nui o Hiva, e te moana nui no Europa.

Te area ia e vai nei, ia tätou.

 

Tei roto tätou i te rima òhipa no te mau taote.

Te faaitoito nei rätou i te mau raveà atoà.

No te faaòhipa i to rätou, ìte, marämarama e te paari.

Ia noaa, ia rätou te puai no te ìriti te maì e haafifi rä.

Te tupu maitaìraa no te tino o tera,

Metua tane, metua vahine, taureàreà tamaroa, tamahine, âiu.

 

Te noho nei tätou i roto i te ùtuafare matau-òre-hia.

Tei taui i to tätou oraraa mätauhia, i te mau mahana atoà.

Te àmu, te inu nei tätou i te mea ê atu i mätauhia.

E maa, e pape no roto i te fenua tei färii ia tätou.

Tei faaâpï i to tätou oararaa, i roto i te tiaìtururaa.

 

Na te maì te reira i horoà ia tätou, i te oraraa âpï.

Na te maì, i faanaho faahou ia tätou.

Na te maì i horoà ia tätou i te òhipa âpï.

Na te maì i faaìte ia tätou te puai o te ora.

Na te maì e haafatata ia tätou i pihaiiho i te Fatu o te ora.

 

Färii mai òutou i te täpaò, no te aroha o te mau fenua o Mäòhi Nui.

 

 

A hiò atu ai tätou i te huru o ta tätou taiòraa e to na faanahoraa ia au te faaìteraa a Mareto i te pene 9, i te mau ìrava 38 e tae i te 48. E piti tumu tei manaòhia éi parau aè no tätou i teie farereiraa, 1)  O vai te faaìte, 2) Teimaha o te Haapiiraa.

 

Te huru o ta tätou taiòraa.

O vai te faaìte.

1-    Te hiòraa a te mau pipi, i te tahi mau taata e tiàvaru rä i te mau temoni i te iòa o Ietu. Ua täpeàhia e te mau pipi teie òhipa, no te mea aita teie taata i pee ia Ietu. O vai teie taata e parauhia nei e te mau pipi. E tià ia parauhia e mau taata teie e tiàturi nei e ora rätou e te òhipa ta rätou e rave ra i te iòa o Ietu. Òre noa atu ai rätou e pee ia Ietu

2-    Ietu i mua i te parauraa te mau pipi, te haapäpü ra o Ietu i te òhipa a teie taata te faatupuraa i te temeio i te iòa o Ietu. Te faarooraa o Ietu i teie mau parau, te ìtehia nei tei tahi manuiaraa no ta na mau faaìteraa i te patireia o to na Metua Tumu Tahi. E òhipa maitaì ta teie taata e rave nei i te iòa o Ietu, ta Ietu ia parau i ta na mau pipi ia au ta te Ioane pene 15 i te ìrava 16vh, Ia horoà mai te Metua ia òutou i ta òutou e ani atu ma to ù nei

iòa ia na ra. Te òhipa ia e ravehia e te mau pipi i to Ietu e revaraa,        ia au te faaìteraa a te puta Òhipa i te pene 2 e tae i te pene 5.

3-    Te haapiiraa a Ietu, te taata e rave i te òhipa i to ù nei iòa, e òre faaìno mai, e òre faaìno ia vetahi ê, no te mea tei te pae òia ia Ietu, tei te pae anaè ia Ietu, no te mau taata atoà ia, èita ra e täpeà i te òhipa e faatupu ra i te maitaì, e faaitoito ra ia òtohe te ìno i mua i te maitaì.

 

Teimaha o te Haapiiraa

 

Te piti o te tuhaa o ta tätou taiòraa, te ìtehia nei te teimaha o te haapiiraa a Ietu. I to Ietu faahitiraa teie mau parau i muri nei.

-         Tei faaturori i te taata faaroo ra, e täamau i te ôfaì mure i te àî, a taora ia i

-         raro i te TAI.

-         Te hapa ra te hoê rima e täpü, mea maitaì i rima hoê ia tae i te AO.

-         Te hapa ra te âvae e täpü, mea maitaì te pirioì ia tae i te AO.

-         Te hapa ra te mata e ôhiti, mea maitaì i te mata hoê ia tae i te PATIREIA.

Te faaroo nei tätou i teie huru parauraa na Ietu e mea teimaha mau teie mau manaò, e tüpü roa te tahi mau faanahoraa huru ê i roto i te âau, e te paruparu i roto i te maì.

E to mätou mau taeaè, mau tuahine, mau tureàreà tamaroa, tamahine, te mau âiu, tei ìtehia, tei òre i ìtehia, tei faaroohia, tei òre i faaroohia, i teie mahana te ìriti nei o Ietu i mua ia tätou tei tahi ùputa no te àroraa i te maì, te huru o te maì. Te TAI, e aha te TAI i to òutou manaòraa,,,,,,,,,,,,,,,,, te vahi mätamua o ta te Atua i òhipa no te faatupu i ta na ôpuaraa faaora no te taata, ua äni te Atua i te mana o te TAI ia faataa i te tahi tuhaa ia tià ia na ia faatiàrepu i to na Värua, ua färii te TAI i te reira, i faatiàrepu ai te Atua i to na Värua i nià i te ìriätai. Te AO, e aha te AO ta Ietu e parau nei, i ta òutou parauraa,,,,,,,,,,,,,,,,, Te AO, no roto mai to na parau i te pöuri, i to te Atua parauraa ia MARÄMARAMA vaiiho mai ra te pöuri i te AO ia rave i  ta na òhipa i te PARAURAA a te ATUA. No reira te AO e parauhia nei o te ora ia, a faaroo tütonu maite na i te mau reo O Ietu i roto i ta tätou taiòraa, mea maitaì i te rima hoê, te âvae hoê, mata hoê, ia tae i te AO ra, e ora teie ta Ietu e parau nei, aita O Ietu i parau e täpü no te haere i roto i te pohe, no te haere ra i roto i te AO, òia hoì te ORA, to tätou te reira MARÄMARAMA.

Te PATIREA, e vahi i faataahia no te feiä ORA, te feiä i roto e parahi fatata noa rätou i pihaiiho i te mau tïtauraa a te Atua, e mau taata ìmi raveà.

 


                                                                                                            Teraì. òr

Partager cet article

Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens

Partager cette page Facebook Twitter Google+ Pinterest
Suivre ce blog